Gen 29 | NdeIBE | STEP | UJakhobe waseqhubeka ngohambo lwakhe wayafika elizweni labantu bempumalanga.

Genesis 29

UJakhobe Ufika ePhadani Aramu

1 UJakhobe waseqhubeka ngohambo lwakhe wayafika elizweni labantu bempumalanga. 2 Wabona khonale umthombo esiqintini, kulemihlambi yezimvu emithathu ilele eduzane kwawo ngokuba imihlambi yayinatha khonapho emthonjeni lowo. Ilitshe elalivale umlomo womthombo lalilikhulu.

3 Kwakusithi yonke imihlambi ingabuthana khona, abelusi baligiqe ilitshe balisuse emlonyeni womthombo banathise izimvu. Besebelibuyisela ilitshe endaweni yalo emlonyeni womthombo.

4 UJakhobe wabuza abelusi wathi, “Bafowethu, livela ngaphi?” Baphendula bathi, “Sivela eHarani.”

5 Wathi, “Liyamazi yini uLabani, umzukulu kaNahori?” Baphendula bathi, “Yebo, siyamazi.”

6 UJakhobe wasebabuza wathi, “Uyaphila yini?” Bathi, “Yebo, uyaphila; nansi indodakazi yakhe uRakheli esiza lezimvu.”

7 Wathi, “Khangelani, ilanga lilokhu lisemini; akukabi yisikhathi sokuthi imihlambi ibuthwe. Zinathiseni izimvu lezi lizibuyisele emadlelweni.”

8 Baphendula bathi, “Singeke, ize iqale iqoqane yonke imihlambi ilitshe beselisuswa emlonyeni womthombo. Lapho-ke sizazinathisa izimvu.”

9 Wathi elokhu esakhuluma labo uRakheli wafika lezimvu zikayise, ngokuba wayengumelusi. 10 UJakhobe wathi ebona uRakheli, indodakazi kaLabani, umnewabo kanina esiza lezimvu zikaLabani, wahamba wayagiqa ilitshe elalisemlonyeni womthombo wanathisa izimvu zikamalumakhe. 11 UJakhobe wasesanga uRakheli njalo wakhala kakhulu.

12 Wayesemtshelile uRakheli ukuthi wayeyisihlobo sikayise lokuthi wayeyindodana kaRabheka. Ngakho intombi yagijima yayabikela uyise.

13 ULabani wonela ukuwuzwa umbiko ngoJakhobe, indodana kadadewabo, wahle waphuthuma wayamhlangabeza. Wamgona wamanga, wamletha ngekhaya, lapho uJakhobe amtshela khona izinto lezi. 14 ULabani wasesithi kuye, “Uyinyama yami legazi lami.”

UJakhobe Uthatha uLeya loRakheli

UJakhobe esehlale laye okwenyanga yonke,

15 uLabani wathi kuye, “Kambe sekungathi ngoba uyisihlobo sami ubusungisebenzela ungaholi lutho? Akungitshele, uthi umholo wakho ube yini?”

16 ULabani wayelamadodakazi amabili; ibizo lendala lalinguLeya, encinyane inguRakheli.

17 ULeya wayelamehlo abuthakathaka, kodwa uRakheli wayelesimo esibukekayo, emuhle.

18 UJakhobe wezwa emthanda uRakheli wasesithi, “Ngizakusebenzela okweminyaka eyisikhombisa ukuze ungiphe indodakazi yakho encane uRakheli.”

19 ULabani wathi, “Kungcono ngimuphe wena kulokuba ngimuphe enye indoda. Hlala lapha lami.” 20 UJakhobe waseyisebenza iminyaka eyisikhombisa ukuze azuze uRakheli, kodwa yakhanya ingathi yizinsukwana ezimbalwa kuye ngenxa yothando kuye.

21 UJakhobe wasesithi kuLabani, “Ngipha-ke umkami. Isikhathi sami sesigcwalisekile, sengifuna ukwembatha laye.”

22 Ngakho uLabani wasenxusa bonke abantu bendawo wenza idili. 23 Kodwa kwathi sekusihlwa, wathatha indodakazi yakhe uLeya wamupha uJakhobe, uJakhobe wembatha laye.

24 ULabani waphinda wapha uLeya incekukazi yakhe uZilipha ukuba ibe yincekukazi yakhe.

25 Kwathi sekusile, wabona kunguLeya! UJakhobe wathi kuLabani, “Kuyini lokhu okwenzileyo kimi? Mina ngasebenzela uRakheli, kakunjalo na? Yini ungikhohlisa?”

26 ULabani waphendula wathi, “Kakusiwo mkhubo wethu lapha ukwendisa indodakazi encane endala ingakendi. 27 Qeda iviki yakhe lo, yokuqobodisa; yikho sizakupha lalo omncane njalo ngemva kokumsebenzela eminye iminyaka eyisikhombisa.”

28 UJakhobe wenza njalo. Waqeda iviki eloLeya, yikho uLabani wasemupha indodakazi yakhe uRakheli ukuba ngumkakhe. 29 ULabani wanika indodakazi yakhe uRakheli incekukazi yakhe uBhiliha ukuba abe yincekukazi yakhe.

30 UJakhobe wembatha loRakheli laye, wamthanda okudlula uLeya. Wasesebenzela uLabani okweminye njalo iminyaka eyisikhombisa.

Abantwana bakaJakhobe

31 UJehova wathi ngokubona ukuthi uLeya wayengathandwa wavula isizalo sakhe, kodwa uRakheli wayeyinyumba. 32 ULeya wathatha isisu wazala indodana. Wamutha ibizo wathi nguRubheni, ngoba wathi, “Kungenxa yokuthi uJehova usebonile ukuhlupheka kwami. Ngempela umkami usezangithanda manje.”

33 Wathatha isisu njalo, wathi esephinde umfana njalo wathi, “Ngokuba uJehova wezwa ukuthi kangithandwa, wanginika lo njalo.” Ngakho wamutha wathi nguSimeyoni.

34 Wasithatha njalo isisu, kwathi esezele omunye umfana wathi, “Khathesi-ke umkami usezabambelela kimi ngoba sengimzalele amadodana amathathu.” Yikho wathiwa nguLevi.

35 Waphinda wasithatha isisu, wazuza umfana wathi, “Ngalesi isikhathi ngizadumisa uJehova.” Wamutha wathi nguJuda. Wasesima ukuzuza abantwana.